澳職5點場，由布里斯班獅吼主場對紐卡素噴射機，兩隊今季成績都差，喺積分榜下游徘徊，特別係獅吼近5次主場出擊全敗，合共失14球，防線猶如不設防，毫無地利優勢可言。噴射機早前曾作客大勝珀斯光輝4比0，具備不俗反擊力，今場受讓平半，下盤有計。（無綫myTV SUPER周二下午5時直播）文:邪神
跨季14場未贏過
經過10輪賽事，獅吼仍未打開勝利之門，僅得2和8負，入12球失25球，排墊底嘅13位，佢哋上次贏波已經係去年4月初上季尾嘅賽事，贏西悉尼流浪者2比1，之後跨季14場未贏過。當輸波成為習慣，實在好難再燃起球員鬥心，佢哋新年第1場主場迎戰中岸水手又輸1比3，主場5連敗，之前對表現走晒樣嘅珀斯光輝都輸0比1，今場對榜尾另一對手噴射機，完全無資格讓波。
至於噴射機9戰只得7分排11位，但起碼佢哋有入球能力，防線亦冇獅吼咁鬆散，新年第1場就同FC悉尼踢成2比2，呢場波佢哋兩度領先，可惜完場前1分鐘失守先被逼和，反映出球隊有一定戰鬥力，今場仲有得受讓，下盤當然不容錯過。
